საქართველოს საერთაშორისო უნივერსიტეტის სამართლის საბაკალავრო პროგრამის სტუდენტმა, მარი ლომაიამ, მონაწილეობა მიიღო საერთაშორისო ახალგაზრდულ გაცვლით პროექტში „ღირებულებების ოლიმპიადა: ინკლუზიური ევროპის აღმშენებლობა“. პროექტი ჩატარდა 2025 წლის სექტემბერში, ბასკეთის ქალაქ ჰონდარიბიაში (ესპანეთი). ის სრულად დაფინანსდა ევროკავშირის მიერ და მიზნად ისახავდა საერთო ევროპული ღირებულებების პოპულარიზაციას, სოციალური პასუხისმგებლობის ამაღლებასა და ახალგაზრდებში მრავალფეროვნებისა და ინკლუზიის მხარდაჭერას.
აღნიშნული გაცვლითი პროექტის ფარგლებში, მარი ლომაია და სხვა მონაწილეები აქტიურად ჩაერთვნენ არაფორმალური განათლების სხვადასხვა აქტივობაში, როგორიც იყო დებატები, კრეატიული პრეზენტაციები, ჯგუფური სამუშაოები და მხატვრული თვითგამოხატვა. ამ მეთოდებმა ხელი შეუწყო ღია დიალოგს ისეთ თემებზე, როგორიცაა იდენტობა, აქტიური მოქალაქეობა, ჯანმრთელობა და კეთილდღეობა, ასევე კულტურულ, თაობათა შორის და სოციალურ განსხვავებებს შორის ხიდის გადება. ეს გაცვლითი პროექტი იყო შესაძლებლობა ახალგაზრდებისთვის, დაფიქრებულიყვნენ საკუთარ როლზე უფრო ინკლუზიური და ერთიანი ევროპის მშენებლობაში.
პროექტში მონაწილეობის შედეგად, მარი ლომაიამ განივითარა მნიშვნელოვანი უნარები: ეფექტური კომუნიკაცია, კრეატიულობა, ავტონომიურობა და ინიციატივიანობა. მან და სხვა მონაწილეებმა ასევე იმუშავეს ცნობიერების ამაღლების კამპანიებზე და გაუზიარეს ერთმანეთს თავიანთ ქვეყნებში არსებული რეალობები, რაც პროექტს განსაკუთრებულ მნიშვნელობას ანიჭებდა ევროპული საზოგადოების ურთიერთგაგებისა და თანამშრომლობის კონტექსტში.