სამართლის სკოლა

სკოლის ერთ-ერთი მთავარი ღირებულება მისი აკადემიური პერსონალია. სასწავლო პროცესში ჩართული არიან როგორც წამყვანი თეორეტიკოსები და მეცნიერები, ისე გამორჩეული პრაქტიკოსი იურისტები – მოქმედი მოსამართლეები, ადვოკატები, ნოტარიუსები და დარგის სხვა გამოცდილი სპეციალისტები. ცოდნისა და პრაქტიკის ეს სინთეზი სტუდენტს საშუალებას აძლევს, სამართლის ნორმა არა მხოლოდ თეორიულ დონეზე შეისწავლოს, არამედ მისი რეალურ ცხოვრებაში გამოყენების ხელოვნებასაც დაეუფლოს.

სამართლის სკოლას მჭიდრო თანამშრომლობა აქვს დამყარებული არაერთ კერძო და სახელმწიფო ორგანიზაციასთან. ეს პარტნიორული ქსელი სტუდენტებს პრაქტიკის გავლისა და პროფესიულ გარემოსთან უშუალო შეხების იმ შესაძლებლობას აძლევს, რომელიც აკადემიურ ცოდნას რეალურ სამუშაო კონტექსტში გარდაქმნის. სტუდენტები ჯერ კიდევ სწავლის პერიოდში ეცნობიან პროფესიის ყოველდღიურ გამოწვევებს, ივითარებენ საქმისადმი პასუხისმგებლიან დამოკიდებულებას და ამყარებენ პირველ პროფესიულ კავშირებს.

სამართლის სკოლა სტუდენტებს საერთაშორისო აკადემიური გამოცდილების მიღების ფართო შესაძლებლობას სთავაზობს. GIU-ს გაცვლითი პროგრამების ფარგლებში სტუდენტებს შეუძლიათ სწავლა ევროპისა და აზიის 40-მდე პარტნიორ უნივერსიტეტში – მათ შორის, გერმანიაში, სლოვაკეთში, ჩინეთში, სამხრეთ კორეაში, მალაიზიაში, უნგრეთში, პოლონეთში და სხვ. საზღვარგარეთ სწავლის სემესტრი სტუდენტს განსხვავებული სამართლებრივი სისტემების გაცნობის, აკადემიური ჰორიზონტის გაფართოებისა და საერთაშორისო პროფესიული ქსელის ჩამოყალიბების უნიკალურ საშუალებას აძლევს.

GIU-ს სტუდენტებს შესაძლებლობა აქვთ, ინგლისურ ენასთან ერთად, დამატებით შეისწავლონ დღეს ერთ-ერთი ყველაზე მოთხოვნადი ენა — ჩინური ან კორეული. თანამედროვე გლობალურ და პროფესიულ გარემოში ამ ენების ცოდნა კურსდამთავრებულს დამატებით კონკურენტულ უპირატესობას ანიჭებს და ახალ საერთაშორისო შესაძლებლობებს უხსნის.

სკოლა სტუდენტებს სთავაზობს სტიპენდიისა და სწავლის დაფინანსების მრავალფეროვან შესაძლებლობებს, რაც ხელს უწყობს ხარისხიანი იურიდიული განათლების ხელმისაწვდომობას მოტივირებული და შედეგზე ორიენტირებული ახალგაზრდებისთვის. დაფინანსების მექანიზმები აღიარებს როგორც აკადემიურ მიღწევებს, ისე სტუდენტის პროფესიულ პოტენციალს.

GIU-ს სამართლის საბაკალავრო პროგრამის კურსდამთავრებულები წარმატებით არიან დასაქმებული მაღალ პოზიციებზე როგორც სახელმწიფო უწყებებში, ისე კერძო სექტორში. ეს შედეგი სკოლის საგანმანათლებლო მოდელის სიმყარეს ადასტურებს, სადაც აკადემიური ცოდნა, პრაქტიკული უნარები და საერთაშორისო გამოცდილება კურსდამთავრებულს კონკურენტულ და მოთხოვნად პროფესიონალად ამზადებს.

სკოლა აღჭურვილია თანამედროვე იურიდიული განათლებისთვის აუცილებელი ინფრასტრუქტურით, რომელიც სასწავლო პროცესს პრაქტიკულ და ინტერაქციულ განზომილებას მატებს:

• მდიდარი საბიბლიოთეკო რესურსი — თანამედროვე იურიდიული ლიტერატურა და მონაცემთა ბაზები, რომლებიც კვლევითი და აკადემიური მუშაობის მყარ საფუძველს ქმნის.
• იმიტირებული სასამართლო პროცესის დარბაზი — სივრცე, სადაც სტუდენტები რეალურ სასამართლო გარემოს ბაძავენ და გამოსვლის, არგუმენტაციისა და საპროცესო უნარებს ივითარებენ.
• კრიმინალისტიკის ლაბორატორია — სადაც სტუდენტები პრაქტიკული აქტივობების მეშვეობით ითვისებენ სამართალდარღვევის კვლევისა და მტკიცებულებათა ანალიზის მეთოდებს.
• სასწავლო პროგრამის მიღმა, ექსტრაკურიკულარულ დონეზე, სკოლაში ფუნქციონირებს იურიდიული კლინიკა — სტუდენტებისთვის განსაკუთრებით ღირებული პრაქტიკული პლატფორმა. კლინიკის ფარგლებში სტუდენტები გამოცდილ იურისტთა ხელმძღვანელობით რეალურ საქმეებზე მუშაობენ, რაც მათ თეორიული ცოდნის პრაქტიკაში გამოცდის, პროფესიული პასუხისმგებლობის შეგრძნებისა და საზოგადოებისთვის რეალური სარგებლის მოტანის უნიკალურ შესაძლებლობას აძლევს.